CEBU, Philippines - Patay ang usa ka dalaga nga gipusil sa silingan niini kuyog sa iyang higala sulod sa panimalay sa biktima sa Ybañez Compound, barangay Mambaling sa dakbayan sa Sugbo.
Ang biktima naila nga si Robelyn Binondo, 19, 4th year college na sa usa ka tulonghaan sa dakbayan sa Sugbo.
Samtang ang suspetsado naila nga si Reymond Quipte, molupyo sa maong lugar.
Subay sa imbestigasyon sa Homicide Section sa Cebu City Police Office, ang igsoon sa biktima nga si Rolan mipasangil kang Quipte nga maoy mipusil sa iyang igsoon nga babaye.
Matud pa nga nagkuyog ang suspek sa mga higala sa bodega sa iyang amahan ug didto nag-inom. Apan giingong natugaw ang biktima ug gibadlong ang grupo, apan inay nga mopatuo nasuko hinuon ang suspek ug gisulong ang biktima.
Apan dihang nagkaatubangay na walay daghang estorya gipusil dayon kini sa suspetsado pipila ka higayon hinungdan sa pagkaigo niini sa dughan, tuo ug walang bahin sa lawas ug sa iyang tuong bukton. Sumala pa nga nakasuway pa unta og dagan ang biktima apan gigukod kini sa suspek ug gitiwasan pagpusil sa likod ang babaye nga maoy hinungdan sa kamatayon niini.
Human sa maong hitabo daling misibat ang suspetsado kuyog sa iyang mga higala.
Gidala sa H. W. Miller Sanitarium Hospital ang biktima apan gideklarar na kini nga dead on arrival sa mga attending physicians. Usa ka manhunt operation karon ang gilusad batok sa suspek ug sa mga kauban niini. (/EIM) (BANAT NEWS)