Motorsiklo gidagit nakit-an ra

CEBU, Philippines -  Usa ka motorsiklo ang gidagit  sa miaging  kaadlawon didto   sa barangay Tabunok, dakbayan sa Talisay sa wala  hiilhing kawatan. Hinuon gumikan  sa kaabtik  sa kapolisan,  nakit-an  dayon  niini  ang  maong sakyanan.

Gipanag-iya  ang  maong  motorsiklo ni Richie Pizaras, hingkod, nga taga barangay Bulacao,  dakbayan sa Sugbo.

XRM ang  brand ug kolor itom nga motorsiklo nga nagtangag sa plakang OS-1081  ang  nadala  sa kawatan.

Sa imbestigasyon sa kapolisan nasuta nga ang maong sakyanan ni Pizaras iyang giparking  sa kilid sa usa ka establisemento sa maong lugar dihang gidagit kini sa wala hiilhing kawatan.

Sa gipahigayong follow-up operation  nila ni PO3 Ferdinand Pablo ug PO1 Erwin Denila na-recover ang maong motorsiklo nga gibilin didto sa palibot  sa barangay hall sa barangay Duljo, dakbayan sa Sugbo. Ang maong mga polis nangayo og tabang sa kapolisan sa presento II sa pagpangita  nila sa maong motorsiklo.

Base sa talaan sa provincial headquarter sa 50 ka mga police station sa tibuok lalawigan sa Sugbo ang Talisay City Police Station maoy labing daghan og kaso sa carnapping ug kasagarang dagiton mga motorsiklo. Gikan sa buwan sa Enero hangtud sa buwan sa Agosto niining tuiga ang Talisay adunay 31 ka mga insidente sa carnapping.  (BANAT NEWS)