CEBU, Philippines - Ang konseho sa dakbayan sa Sugbo kagahapon miawhag ni Mayor Michael Rama nga angay’ng ipa-insured na g’yud ang mga building nga gipanag-iya sa kagamhanan sa dakbayan.
Si Konsehal Gerardo Carillo mipasabot nga kun adunay insurance ang mga building sa dakbayan mabayran kini sa insurance company kun maigo kini og katalagman.
Nasayran ni Carillo nga daghang mga building nga gipanag-iya sa kagamhanan sa dakbayan sa Sugbo, lakip ang Cebu City Medical Center, nga wala ma-insured.
Ang Commission on Audit (COA) milakip niining maong findings sa ilang Annual Audit Report sa miaging tuig bahin sa kapakyas sa administrasyon ni Mayor Rama pagpa-insured sa buildings.
Ang konseho sa dakbayan miaprobar og daku nga budget alang sa pagpa-insured sa mga building ug ubang kabtangan sa dakbayan apan wala kini gamita sa mga opisyal sa City Hall.
Gani adunay tinguha unta nga ang gahin alang sa pagbayad og insurance sa mga building ug makinarya gastohon na lang sa laing katuyoan.
Ang administrasyon ni Mayor Rama naproblema karon sa pagpangita’g budget aron gastohon sa pagpatukod og tambalanan nga ipuli sa CCMC building nga iyang ipaguba. Kini maoy nakaaghat ni Mayor Rama nga ilusad ang “Peso Mo, Ospital Ko†project diin ang City Hall mangayo’g tabang gikan sa publiko aron makatigum kini og kwarta nga ikatabang pagpatukod og bag-ong ospital. – (BANAT NEWS)