Polis “red alert” sa kalag-kalag

CEBU, Philippines - Nagpabilin nga gipaubos sa red alert status ang tibook rehiyon nunot niining  kasaulogan sa Kalag-kalag, matud pa sa Dep. Regional Director for Administration sa Police Regional Office 7 Chief Superintendent Generoso Cerbo Jr.

Miingon si Cerbo nga walay pahuway ang kapolisan sa rehiyon aron masiguro nga hapsay ang  kasaulogan sa Kalag-kalag karong tuiga.

Si Cerbo miingon nga andam ang kapolisan sa rehiyon nga ipakatap sa nagkalain-laing mga bus terminals, pantalan ug sa airport lakip na usab sa mga sam-ang ug mga malls.

Gitinguha sa kapolisan ang police visibility ug ang tabang sa  mga LGU  aron hapsay ang pagbisita sa mga tawo sa mga sam-ang. Magtukod og Public assistance desk ang kapolisan sa matag sam-ang ug mipahinumdom  nga magbantay ang mga tawo sa ilang pagbisita sa mga sementeryo labi sa mga mangunguot.

Mipahinumdom usab ang hepe sa Regional Intelligence Division  Supt. Paul Labra II sa publiko nga kun moadto na unya sa menteryo kinahanglan nga binlan og bantay ang tagsa-tagsa ka mga panimalay.

Matud ni Labra nga kun maghurot og adto sa menteryo basin unya adunay mga akyat bahay nga mopahimulos sa higayon. Si Sr. Supt. Noli Romana miingon nga iyang gihangyo ang usa ka telecom provider nga magmontar og CCTV sa tulo ka mga dagkong sam-ang sa dakbayan aron ma-monitor ang kahimtang niini.

Samtang ang Provincial Director sa Cebu Provincial Police Office Sr. Supt. Noel Gillamac miingon nga iyang ipakatap ang 2,000 kapin ka polis sa tibook probinsya lakip na sa mga canine dogs sa mga bus terminals.

Gihingusgan gyud pagmando  ni  Gillamac  nga  ipabiling  walay  mo-parking sa daplin  sa  mga  karsada aron magpabilin ang kahapsay sa   trapiko sa  tibook probinsya.

Gani iyang gimando nga papangitaon og bakanti nga lote sa duol sa mga sam-ang ang mga local nga  kapolisan aron himoong parking area.

Gipasusi usab ni Gillamac ang mga taho sa mga tawo kalabot  unya sa magpakaaron -ingnong mga pari aron makasapi sa Kalag-kalag pinaagi  sa  pakig-alayon sa mga parokya kalabot niini.  (BANAT NEWS)