Kalagkalag rerouting sa Cebu City

CEBU, Philippines - Ang City Traffic Operations Management (CITOM) mopatuman og rerouting sa mga sakyanan sa  pagsaulog sa adlaw sa mga Santos ug Kalag nga gisugdan  kagahapon hangtud karong Nobiyembre 2, 2013.

Diha sa sementeryo sa barangay Pardo ang tanang sakyanan dili tugotan nga moagi diha sa dalan Dela Victoria ug Sabellano. Ang maong mga karsada paingon kini ngadto sa sementeryo.

Ang mga sakyanan tugotan kining makaparada diha habig sa dalan J. Tabura ug sa offset bay sa N. Bacalso Avenue atubangan sa simbahan. Ang loading ug ang unloading area anha diha sa dalan Tabura. Sa sementeryo sa barangay Labangon, ang tanang mga sakyanan nga gikan sa dalan Katipunan adto kini paagion sa dalan A. Lopez dayon liko sa wala sa dalan Balaga paingon ngadto sa sementeryo.

Ang gikan sa sementeryo nga moagi sa dalan Balaga moliko kini sa tuo paingon ngadto sa Tranza Road ug gawas kini ngadto sa dalan Katipunan. Ang mga sakyanan pweding makaparada diha sa duha ka habig sa dalan Katipunan samtang ang loading ug unloading area anha sa dalan Balagon o Balaga.

Ang tanang mga sakyanan nga mopaingon sa sementeryo sa barangay Calamba nga moagi sa V. Rama Avenue mao ra gihapon ang rota niini apan ang mga sakyanan dili tugotang moparada o mopundo diha duol sa sementeryo sa may V. Rama Avenue. Ang mga tartanilya ug traysikad dili tugotang moagi diha sa V. Rama Avenue palikuon sila sa tuo paingon ngadto sa dalan Alcantara ug balik sa ilang destinasyon.

Ang mga designated parking area anha diha sa V. Rama Avenue gawas lang diha duol sa gate sa sementeryo ug ang loading ug unloading area anha diha sa V. Rama Avenue lapas sa Lucio Drive paingon ngadto sa N. Bacalso Avenue.

Sa barangay Talamban, ang tanang mga sakyanan gikan sa downtown area nga moagi sa Talamban proper adto kini moagi sa dalan Borbajo dayon liko sa wala ngadto sa dalan SOS ug liko na usab sa wala o tuo paingon ngadto sa dalan Miñoza gikan sa dalan Borbajo. Ang loading ug unloading area diha sa kilid sa sementeryo sa may dalan Miñoza. Sa Cempark cemetery, ang tanang sakyanan gawas sa mga truck ug trailer gikan sa downtown area nga moagi sa Governor Cuenco Avenue paingon ngadto sa Cempark cemetery anha moagi sa pinakatuong habig sa dalan ug moliko ngadto sa tuo paingon sa dalan J. Panis (dalan nga paingon ngadto sa Cempark cemetery).

Ang mga sakyanan anha molusot sa gate sa may dalan A.S. Fortuna o adto molusot sa gate sa may dalan Orel paingon ngadto sa dakbayan sa Mandaue. Ang mga parking area anha diha sa may Gaisano Country Mall (Bowling Lane) ug ang loading ug unloading area anha diha sa may dalan J. Panis gikan sa gate sa Cempark paingon ngadto sa Governor Cuenco Avenue.

Samtang sa Old San Miguel, Carreta, Doña Pepang, Chinese, Ludo ug Queen City Garden Cemetery ang mga pasaheroang sakyanan nga molapas diha sa Mabolo moliko kini sa wala paingon ngadto sa Juan Luna Avenue, liko sa tuo ngadto sa S. Osmeña Avenue, liko sa tuo ngadto sa General Maxilom Avenue, liko sa tuo ngadto sa dalan J. C. de Veyra, liko sa wala ngadto sa Juan Luna Avenue, liko sa tuo ngadto sa M.J. Cuenco Avenue ug dayon ngadto sa ilang naandang rota balik sa ilang gigikanan.

Ang mga pasaheroang jeep nga gikan sa Consolacion, Lilo-an, Compostela, Danao, Carmen ug MEPZA sa dakbayan sa Lapu-Lapu adto moagi sa dalan Urot, dayon liko sa tuo paingon sa dalan Cabahug lahos sa A. Soriano Avenue, liko sa wala paingon ngadto sa Juan Luna Avenue, liko sa tuo ngadto sa S. Osmeña Avenue, liko sa tuo ngadto sa General Maxilom Avenue, liko sa tuo ngadto sa dalan J. C. de Veyra, liko sa wala ngadto sa 6th Street lahos ngadto sa North PUJ Terminal.      

Ang gikan sa North PUJ Terminal liko sa tuo ngadto sa 6th Street, liko sa wala ngadto sa dalan J. C. de Veyra, liko sa wala ngadto sa Juan Luna Avenue, liko sa tuo ngadto sa A. Soriano Avenue dayon sa ilang naandang rota balik sa ilang gigikanan. Ang pasaheroan jeep gikan sa habagatan nga moagi sa dalan Benedicto molahos kini ngadto sa dalan JC Veyra o liko sa tuo ngadto sa General Maxilom Avenue Extension, liko sa wala ngadto sa S. Osmeña dayon sa ilang destinasyon sa SM City o North Bus Terminal.

Ang mga pasaheroang jeep gikan sa Urgello ug Private nga moagi sa dalan Benedicto paingon sa Pier area moliko kini sa tuo paingon ngadto sa General Maxilom Extension, liko sa tuo ngadto sa S. Osmeña Avenue ug balik sa ilang naandang rota paingon sa ilang gigikanan. Ang loading ug unloading area sa mga pasaheroang jeep gikan sa SM City anha sa Juan Luna Avenue, liko sa tuo ngadto sa S. Osmeña Avenue dayon sa ilang naandang rota paingon ngadto sa ilang gigikanan.

Ang mga pasaheroang jeep gikan sa South Bus Terminal nga dunay rotang No. 02B anha moagi sa S. Osmeña Avenue, liko sa tuo paingon sa T. Padilla Extension, liko sa tuo ngadto sa MJ Cuenco Avenue paingon ngadto sa ilang naandang rota balik sa ilang gigikanan.

Sa sementeryo sa Lorega San Miguel, ang parking area anha diha sa walang bahin sa General Echavez Extension, sa pagpaingon ngadto sa sementeryo ang loading ug ang unloading area anha sa tuong bahin sa karsada.

Sa sementeryo sa Carreta, ang parking area anha diha sa General Maxilom Avenue (sa kanhi Sacred Heart School), samtang ang loading ug unloading area anha duol sa gate sa Carreta cemetery. Sa Doña Pepang Cemetery, ang parking area niini anha diha sa M.J. Cuenco Avenue sa walang bahin paingon sa General Maxilom Avenue ug ang loading ug unloading area  anha sa tuong habig sa M.J. Cuenco Avenue paingon ngadto sa General Maxilom Avenue.

Sa Chinese Cemetery ang designated parking area anha sa wala bahin sa M.J. Cuenco Avenue paingon ngadto sa Hipodromo ug ang loading ug unloading area anha sa tuong bahin duol sa gate sa Chinese Cemetery paingon ngadto sa Mactan Road. Sa Ludo and Queen City Garden Cemetery, ang parking area anha sa tuong bahin sa Don Andres Soriano Avenue paingon ngadto sa Juan Luna Avenue sa Gaisano Street, 6th Avenue ug West 1 Road North 6 samtang ang loading ug unloading area anha sa wala nga bahin sa Andres Soriano Avenue paingon ngadto sa  Juan Luna Avenue. Ang mga motorista, drayber ug ubang road users giawhag sa pagsunod sa mga traffic sign nga gipamutang diha sa mga naapektohang karsada aron malikayan ang kahuot sa trapiko. (BANAT NEWS)