Polling precinct sa Sogod gilungkab

CEBU, Philippines - Usa ka polling precinct ang gilungkab sa wala pa mailhing mga tawo sa wala pa magsugod ang eleksyon sa Mangadlaw Elementary School sa sitio Mandalaw, Barangay Cabalawan sa lungsod sa Sogod ug nadiskubrehan kagahapon pa sa kaadlawon.

Matud pa nga nahibulong ang mga Board of Election Tellers nga ang classroom nga ilang gamitonon  nga polling precinct naguba na ang padlock.

Lakip sa giguba ang Home Economics room sa maong tulonghaan nga katupad sa gilungkab nga classroom.

Ang chairman sa BET nga si Maria Carla Segukos sa maong eskuylahan kauban ang polling clerk nga sila si Merly Arnejo ug si Janet Gerardo maoy nakadiskubre sa maong pagpanglungkab.

Tungod niini, daling nangayo og tabang si Segukos ni PO1 Jose Reden Hortellano. Matud pa nga wala hilabti ang computer set, dispenser, ug amplifier sa maong lawak apan nangabungkag na ang mga gamit sa maong classroom nga gihimong polling precinct.

Gisalikway hinuon sa kapolisan nga election related ang maong hitabo sanglit wala may kontra ang mga incumbent nga mga opisyales sa barangay.

Hinuon walay election paraphernalia nga nahilabtan sanglit wala man kini gibilin sa maong lawak kay gidala kini nila ni Segukos sa pagbukas sa pagbotar kagahapon. (/EIM) (BANAT NEWS)