SWAT idestino didto sa Punta Ingaño

CEBU, Philippines - Ang barangay Punta Ingano sa dakbayan sa Lapulapu maoy nag-una nga barangay sa maong  dakbayan nga gibantayang higpit sa kapolisan alang  sa barangay election  ugma,  Lunes.

Si SPO1 Joseph Damasco sa Presinto 2 sa Lapulapu City Police Office (LLCPO) nga nagbase sa barangay Mactan mibutyag  sa Banat News nga adto didto  idestino  sa maong  barangay  ang  mga membro  sa  Special Weapons and Tactics (SWAT). Dugang pa ni  SPO1 Damasco nga si Chief Inspector Conrado Manatad nga maoy ilang hepe sa nahisgotang presinto  nagsugod na sa pagdestino og mga polis sa publikong tulunghaan sa barangay Punta Ingano.

Ang  mga  tulunghaan  maoy  magsilbing polling precinct sa  adlaw sa piniliay sa barangay.

Si Senior Superintendent Rey Lyndon Lawas nga nahinabi sa Banat News miingon nga gawas sa iyang mga sakop sa kapolisan nga tahasan sa pagbantay, motabang  usab kanila ang Central Command ug mga sakop sa kasundalohan nga naglakip sa Philippine Army, Philippine Navy ug Philippine Air Force.

Dugang pa ni Lawas nga dako og bintaha ang dakbayan sa Lapulapu sa paghatag og kasiguroan nga  mabantayan ang  kahapsay ug malinawon nga piniliay tungod  kay   anaa man usab ang Centcom ug PAF mahimutang sa maong lugar.

Matud pa ni Lawas nga dali rang  mapakgang  kun  may  kagubot   ug kalikayan ang dugoong panghitabo  karong election.

Hinuon  sa miaging barangay election  may  pagpamusil  nga nahitabo  sa  maong  barangay  nga mikalas og kinabuhi.

Ang dakbayan sa Lapulapu  gilangkoban sa 30 ka barangay, diin  19  niini  anaa  sa  mainland ug 11 ka barangay usab ang  tua  sa Isla sa Olango sa maong dakbayan. (BANAT NEWS)