Central Visayas nakabangon na

CEBU, Philippines - Sa hinay-hinay daw nakabangon na kita sa dakung kadaot nga namugna sa kusog nga linog niadtong Oktubre 15, 2013. Duha ka dagkung probinsya sa Central Visayas ang naapektohan.

Apan ang Sugbo daw normal na ang dagan sa panginabuhi sanglit dili man kaayo daku ang nahimong danyos. Dili sama sa probinsiya sa Bohol nga hangtud karon dili pa gyud normal ang ilahang sitwasyon kay lagi daghang mga panimalay ug edipisyo ang nangagusbat ug gani daghang mga kinabuhi ang nakalas. Apan taliwa ning atong mga suliran ato gihapong gipakita nga buhi ang bayanihan spirit natong mga Pilipino.

Gani kita dinhi sa Sugbo, bisan tinuod ug biktima kita sa maong pagtay- og nagkahiusa kita aron atong matabangan ang Bohol. Hinaot nga makalingkawas ra kita sa atong giatubang nga suliran. Matud pa, kining tanang mga pagsuway molabay ra.Kinahanglan lang nga hugot atong pagtuo sa labaw’ng Makagagahom ug magpabiling buhi ang bayanihan spirit natong mga Pinoy.

Sa pikas bahin, hingpit na gyud nga nakabalhin ang mga personnel sa Cebu City Fire Station didto sa Cebu City Sports Complex ug sa Pari-an Fire Sub-station. Alang niadtong taga dakbayan sa Sugbo nga dunay transaksiyon sa opisina sa kabomberohan adto na ninyo kini makita sa lugar nga akong nahisgutan. Kay usahay dunay mga clients nga magbayad unta og fire code fees, mokuha og fire clearance ug uban pang transaksiyon nga molahos gihapon sa may Pahina Central diin anaa usab nahimutang ang rehiyonal nga buhatan sa BFP-7 nga matingala sa kahimtang sa maong opisina.

Dunay usa ka client nangutana nako, nganong hospital naman ni ang opisina sa bombero?Aw, akoa lang gitubag nga temporaryo lamang kini kay lagi dili na luwas gamiton ang CCMC building ug maoy rason nga sa among opisina sila una nagpasilong. Apan paglabay sa pipila ka adlaw, daw dunay tensiyon nga mitumaw gumikan kini sa tinguha sa mayor sa dakbayan sa Sugbo diin gusto niyang ukoparon ang tibuok BFP-7 compound. Gani niadtong Oktubre 23, 2013 nakadawat ang among Regional Director sa BFP-7 nga si Senior Superintendent MA. LUISA C. HADJULA, MM og sulat gikan kang Mayor Mike Rama nga nagmando sa pagbakante sa maong building sulod sa 15 ka adlaw gikan sa pagdawat sa maong komunikasyon.

Alang sa kasayoran sa publiko ang mga personnel na lang sa rehiyonal ug provincial nga buhatan ang nahabilin sa maong compound. Subay sa maong sulat sa mayor, dali kining gitubag sa among direktor ug sa gihapon hugot ang pagsupak niini. Gani namahayag pa kini nga mas maayo pa ang informal settlers kay sa dili pa palayason o i-demolish duna na'y giandam nga kabalhinan niini.

Ang labing siguro, mohimo og legal nga lakang ang kadagkoan sa BFP-7 aron mapanalipdan ang katungod niini batok sa tinguha sa mayor nga mo-take over sa tibuok BFP-7 compound. Subo kaayong palandungon nga pareho ra man unta kaming anaa sa gobiyerno ug parehong nagserbisyo sa katawhan mosangpot sa maong tensiyon ug kasikas.

Dili ba diay pwede nga estoryahon na lang ug lingkuran gayud sa mga kadagkuan sa dakbayan sa Sugbo ug sa BFP-7 aron makakab-ot og solusyon? Hinaut nga makab-ot unya ang hingpit nga solusyon niining maong problema.

Para nako, dili man ang mga personalidad nga nagpuyo ug migamit sa maong edipisyo ang among gipakigbisogan kun dili ang mismong institusyon ang BUREAU OF FIRE PROTECTION maoy giprotektaran. (BANAT NEWS)