CEBU, Philippines - Gilusad sa kagamhanan sa dakbayan sa Mandaue ang “Abag Mandaue†nga gitumong sa pagdawat og hinabang alang sa mga biktima sa linog sa lalawigan sa Bohol.
Si Roger Paller nga maoy tigpamaba sa kagamhanan sa maong dakbayan nga nahinabi sa Banat News miingon nga nag-una sa paghatag og donasyon mao ang mga kawani sa kagamhanan sa maong dakbayan.
Kasagaran sa maong mga hinabang naglakip sa linata nga sardinas, corned beef, noodles, kinilong bugas, sabon nga para kaligo ug para panglaba, kape, asukar, cash donation ug uban pa.
Dugang pa ni Paller nga adunay drop in center nga ilang gipahimutang sa atubangan sa city hall ug bukas kini sugod sa alas 8:00 sa buntag hangtod sa alas 5:00 ang takna sa hapon.
Matud pa ni Paller nga ang si bisan kinsa nga adunay malumo nga kasingkasing gikan sa kabarangayan sa dakbayan o gikan sa sikbit nga kalungsoran nga mahaagi sa city hall mahimo nga motunol sa ilang hinabang sa drop in center. Giklaro niya nga dili pa hinuon sila modawat og donasyon nga mga sapot .
Kasamtangan nilang gitan-aw ang nag-unang panginahanglan sa mga biktima nga mao ang pagkaon.
Sa laing bahin si Paller miingon nga makadawat og P500,000 nga pinansiyal nga hinabang gikan sa kagamhanan sa maong dakbayan ang pamilya sa namatay nga si Jurenda Casul.
Nakaangkon sa iyang hinanaling kamatayon si Casul dihang natagakan kini sa kisame nga bildo sa merkado publiko atol sa pagtay-og sa 7.2 magnitude nga linog niadtong Oktubre 15 niining tuiga. (BANAT NEWS)