CEBU, Philippines - Kabalaka ang gibati sa mga magtutudlo nga moalagad karong Lunes nga piniliay sa barangay nunot sa taho sa Department of Education nga kapin sa usa ka libo ka lawak sa mga tunghaan ang dili na magamit human sa linog.
Ang director rehiyonal sa Department of Education 7, Dr. Carmelita Dulangon, nipahibawo nga sa lalawigan sa Sugbo, 549 ka lawak samtang sa dakbayan sa Sugbo, 531 ang dili na magamit.
Matud pa ni Dulangon atol sa 888 News Forum sa Marco Polo Plaza sa miaging Martes nga kung sa Nobiyembre 4 pa sila mobalik sa klase, labi pa nga dili magamit ang maong mga lawak karong Lunes sa eleksiyon.
Nunot niini, makig-alayon ang DepEd sa Commission on Elections labot sa paggamit sa mga tunghaan alang sa piniliay.
Nabalaka si Dulangon nga daghan usab nga mga magtutudlo ang dili na mosilbi sa eleksiyon ilabi na sa mga edaran kinsa may kahadlok pa sa niaging linog.
Hinoon matud pa niya nga adunay mga reserba nga mga magtutudlo nga ikapuli.
Si Cebu provincial election officer, Atty. Ferdinand Gujilde, miingon nga kinahanglan gyud ibalhin ang mga presinto nga anaa sa mga lawak nga dili na magamit. Gisalikway ni Gujilde ang posibilidad nga maoktaba ang eleksiyon sa mga apektadong lugar sa Sugbo ug dili sama sa Bohol.
Matud pa ni Gujilde nga mananghid sila sa Comelec Manila sa paggamit sa ubang lugar nga kapahigayonan sa eleksiyon hulip sa dili magamit nga mga lawak.— (BANAT NEWS)