Ormoc ug Baybay motunol og hinabang sa Cebu ug Bohol
ORMOC CITY, Philippines – Ang Ormoc City ug Baybay City motunol og kinatibuk-ang P2.1-milyones nga hinabang sa probinsya sa Bohol nga maoy nagrabehan sa 7.2 magnitude nga linog sa milabay’ng semana.
Si Baybay City Mayor Carmen L. Cari miingon nga modonar sila og P500,000 sa Bohol. Gitun-an pa usab nila ang planong paghatag og tag P100,000 sa mga lungsod nga maoy nagrabehan sama sa Loon, Loboc, Maribojoc ug uban pa, apan nangita pa sila og pundo alang niini gikan sa reserbang calamity funds. Una nang gilaraw nilang mopadala og relief goods sa Bohol apan nausab ang plano human nila masayri nga lisod ang paghatud ug pagbiyahe sa ilang mga hinabang.
Sa laing bahin, ang Ormoc City modonar usab og P1.6-milyones sa Bohol ug Cebu, sumala pa ni Ben Matiga, sa City Disaster Risk Reduction Management Council sa maong siyudad.
Matud pang Matiga P500,000 ang ilang itunol sa Province of Bohol, P500,000 sa Cebu Province ug tag P300,000 kada usa sa siyudad sa Tagbilaran ug Cebu City. Matud niya ang ilang request alang sa pundo nasumitir na nila ngadto sa Sanggunian Panlungsod ug gikatakdang tukion sa umaabot nga sesyon.
Sa iyang bahin, si Ormoc Vice Mayor Leo Carmelo Locsin Jr., miingon nga ilahang hatagan og pagtagad ang maong request.
“We’ve been victims of a big calamity once (Ormoc flashflood niadtong 1991) “and was the recipient of the generosity of many generous. It is only right that we also immediately respond to the needs of others,†matud niya.
Gawas sa pagpadala og financial assistance, plano usab nilang mopadala sa ilang Ormoc Rescue Team apan gitambagan sila sa Office of Civil Defense nga dili na kini kinahanglan karon. (BANAT NEWS)
- Latest
