CEBU, Philippines - Nagtinguha ang usa ka kanhi opisyal sa Philippine Air Force (PAF) ug retiradong chief nurse sa Lapulapu City Hospital nga si Grace Estremos sa pagpadayon sa iyang panerbisyo publiko busa magpapili siya pagka-kapitan sa barangay Pajo, dakbayan sa Lapulapu sa umaabot nga election sa Oktubre 28, 2013.
Usa sa iyang mga kaatbang ang magpapatigayon ug kanhi konsehal sa maong dakbayan nga si Jonard Ahong Chan kinsa napildi ni Mayor Paz Radaza sa pagka-mayor sa Lapulapu sa miaging election.
Matud pa ni Estremos nga kun kahatagan siya og higayon nga makaserbisyo sa ilang barangay sa Pajo iyang ipatuman ang mga programa nga makahatag og kaayohan sa kinabag-ang katawhan.
Midugang siya nga dumalahon niya ang mga programa alang sa mga kababayen-an, sa mga hingkod, mga kabataan ug katigulangan.
Dugang pa ni Estremos nga ang halapad niyang kasinatian sa pagserbisyo sa pag-atiman sa kahimsog sa panglawas sa katawhan isip nurse iyang magamit sa iyang katagibarangay.
Matud pa niya nga dihang miretiro na siya sa iyang serbisyo isip chief nurse sa Lapulapu City Hospital naghunahuna na lamang unta siya sa pagpahulay sa panerbisyo publiko ug itingob na lamang ang panahon sa iyang pamilya.
Apan daghan ang naghangyo kaniya sa pagpadayon sa pagpangalagad ug sa pagpaambit sa iyang kasinatian sa panglawas nga maoy labing gikinahanglan sa mga kabus nga molupyo sa barangay Pajo. (/WC) (BANAT NEWS)