CEBU, Philippines - Gihimong double time sa mga ahensya sa gobiyerno nga may labot sa pagpahiuli sa panginabuhi sa mga Boholano ang ilang lihok sumala sa ilang giasoy kang Presidente Benigno Aquino III niadtong Miyerkules sa udto.
Tulo ka mga dagkong ahensya maoy frontliner nga mahibalik ang naandang dagan sa panginabuhi sa mga molupyo sa maong lalawigan.
Kini mao ang Department of Public Works and Highways (DPWH), Department of Social Welfare and Development (DSWD) ug ang Department of Trade and Industry (DTI).
Si Kalihim Rogelio Singson nga gipaandam dayon niya sa opisyal sa DPWH sa rehiyon ug sa maong lalawigan ang mga estimate ug materyales sa mga karsada nga di kaagian ug sa mga karsada nga kaagian og gagmay lang nga mga sakyanan. Lakip usab nga gipaandam niya mao ang mga estimate ug materyales sa mga taytayan nga nangaguba.
Ingon usab niini ang gihimo ni Kalihim Dinky Soliman sa DSWD kinsa nanguna sa pagpanghatag og mga pinutos nga pagkaon ug tubig niadtong Miyerkules sa buntag didto sa dakbayan sa Tagbilaran. Gawas sa mga pagkaon, nagpadala usab siya og mga tolda alang sa 4,000 kapin ka mga bakwit nga didto magpundok sa sports complex sa Tagbilaran.
Samtang gipahugtan ang pagpatuman sa price control law ni Regional Director Aster Caberte sa mga presyo sa batakang palitonon aron ang mga kabus ug nawad-an sa mga balay , mga namatyan og minahal sa kinabuhi dili mabug-atan sa ilang pagpuyo.
Ang bahin sa kuryente gituohan nga karong adlawa mahibalik na sa hingpit ang sugang dagitabnon sa tibuok lalawigan.(/WC) (BANAT NEWS)