Linog wa makadaot sa mga prisohan sa rehiyon
CEBU, Philippines - Walay mga kadaot nga nahitabo sa mga prisohan dinhi sa rehiyon 7 atol sa 7.2 magnitude nga linog niadtong Martes, matud sa hepe sa Bureau of Jail Management and Penology (BJMP) nga si Efren Nemeño.
Matud ni Nemeño nga ang Cebu City Jail ug Mandaue City Jail maoy gisusi sa mga engineer apan mga gamay’ng liki lang nga sama sa buhok ang nakita ug dili kini delikado.
Matud usab niya nga ang mga jail warden mipahibawo dayon sa rehiyonal nga buhatan bahin sa sitwasyon sa edipisyo sa ilang prisohan human sa kusog nga linog.
Gibutyag ni Nemeño nga walay mga report gikan sa mga jail warden bahin sa mga kadaot sa mga prisohan hinungdan nga wala na lang usab siya nagpadala og mga engineer.
Bisan gani ang mga prisohan didto sa Bohol ilabi na sa lungsod sa Carmen nga maoy sentro sa linog giingong walay nahitabong kadaot.
Subay niini ang hepe sa BJMP sa rehiyon nagkanayon nga kanunay silang andam sa posibleng mga hitabo kay aduna silay contingent plan na niini.
Usa sa ilang mga contingent plan mao pagpahigayon og dry run sa posibleng mahitabong insidente nga naglambigit sa katalagman.
Dugang ni Nemeño nga ang tanang mga jail warden gihatagan na og kamanduan kabahin sa pagpahigayon og quarterly dry run. (/WC) (BANAT NEWS)
- Latest
