Lalaki gi-salvage diha sa Talisay
CEBU, Philippines - Usa ka wala mailhing lalaki ang gituohang nabiktima sa summary killing ang nadiskubrehan kagahapon sa kaadlawon diha sa sitio Uldog, barangay Poblacion, dakbayan sa Talisay.
Ang wala pa gihapon mailhing lalaki nakaangkon og tulo ka samad pinusilan sa ulo ug duna kini patik nga “Katrina†dapit sa kilid sa tuong dughan niini, nagsul-ob og puti nga t-shirt, kolor gray nga cargo shorts ug sweat shirt nga kolor green fatigue ug kolor itom nga bull cap.
Si PO3 Junyl Ater, duty desk officer sa Talisay City Police Station mibutyag nga base sa imbestigasyon sa grupo ni SPO1 Mikie Espina, ang maong biktima ug ang kriminal parehong nag-angkas sa usa ka motorsiklo.
Giingong pag-abot diha sa lugar nga nahitaboan milayat gikan sa motorsiklo ang biktima ug gipusil kini sa kauban niining angkas.
Na-recover gikan sa lugar nga nahitaboan ang duha ka kabhang sa bala sa kalibre .45 nga pistola ug usa ka deformed slug.
Gawas niini na-recover sa mga polis gikan sa patay’ng lawas sa biktima ang usa ka ATM card sa Metro Bank nga ang pangalan niini Leonila A. Daan ug usa ka BPI Bank card diin ang pangalan Roel Mabala.
Si Superintendent Resty Santos, officer-in-charge sa Talisay City Police Station sa pakighinabi niini sa Banat News kagahapon nagkanayon nga posibleng atraso ang hinungdan sa maong pagpamusil.
Giingong dunay nakabati nga ang biktima misulti kining “di na ko mousab boss, pasayloa ko.â€
Matud usab ni Santos nga nakadawat sila og report nga ang biktima giingong taga barangay Bulacao, dakbayan sa Sugbo.
Dugang ni Santos nga nagpahigayon sila og follow-up operation sa maong hitabo aron mailhan ang identity sa biktima ug sa mipusil niini. (/EIM) (BANAT NEWS)
- Latest
