PRO-7 mopadala og 120 ka polis sa Bohol

CEBU, Philippines - Mopadala ang Police Regional Office 7 og dugang 120 ka mga polis aron motabang sa pag apod-apod sa mga relief goods ug pagpatunhay sa kahapsay ug kalinaw sa Bohol.

Si Sr. Supt. Edward Carranza Regional Directorial Staff sa PRO7 miingon nga ipadala sa rehiyon mao ang sakop sa Regional Public Safety Battalion nga naa karon sa lungsod sa Sibonga. Gihangyo karon sa PRO7 ang kadagkoan sa PNP nga pabalikon na dinhi sa rehiyon ang 130 ka mga polis didto sa Zamboanga City nga gi-augment sa kapolisan didto atol sa pag-atake sa Moro National Liberation Front (MNLF).

“Their presence is badly needed here because of the earthquake,” matud ni Carranza. Nag-amotay usab ang kapolisan sa rehiyon aron tabangan ang ilang mga kaubanan nga naapektahan sa linog sa Bohol.

Matud pa ni Carranza nga dili lalim ang nahiaguman sa maong mga polis apan bisan pa man sa maong katalagman padayon gihapon sila sa ilang pagserbisyo sa katawhan.

Miingon si Carranza nga gitimbang-timbang karon sa Comelec kung madayon ba ang eleksyon sa Bohol tungod kay ang mga tulonghaan nga gamiton niini nga polling centers nangaguba man samtang nangaguba usab ang ilang mga Comelec offices. (/EIM) (BANAT NEWS)