53-anyos milugos sa 8-anyos nga special child

CEBU, Philippines - Usa ka 53- anyos nga lalaki ang gisikop sa kapulisan human  giingong mimolestiya sa usa ka 8-anyos nga special child adtong Martes sa udto sulod sa balay sa suspek sa lungsod sa Daanbantayan.

Si Manuel “Maning” Rosas, taga-Barangay Talisay, gipasanginlang mimolestiya sa grade three nga bata sulod sa panimalay niini nga dili ra usab layo sa eskwelahan samtang lunch break ang mga estudyante adtong higayuna.

Matud pa nga dili kini maoy unang higayon nga gipanamastamasan sa suspek ang bata matud ni PO2 Clarita Natavio, Women’s and Children’s Desk officer-in-charge.

Sa imbestigasyon sa kapulisan nga ang bata nagduwa-duwa sa may waiting shed gawas sa eskwelahan sa dihang giduol kini sa suspek nga nakainom adtong higayuna dayung haylo og P50 niini ug gipauban kini paingon sa iyang panimalay.

Anang tungura giingong ang silingan sa biktima ang nakabulabog sa suspek human misumbong ang mga bata.

“Dili man pud kuno mao nay unang higayon nga hatagan siya og kwarta sa suspek kay sa una hatagan pud kuno na siya og P20 usahay P5,” matud ni Natavio. Gidala ang biktima sa pink room sa Vicente Sotto Memorial Medical Center sa siyudad sa Sugbo alang sa medical examination.

Matud ni Natavio nga mopasaka sila og rape nga kaso batok sa suspek nga karun natanggong sa Daanbantayan police stockade. (BANAT NEWS)