Mga engineers gipanawagan sa siyudad

CEBU, Philippines - Giawhag ni Mayor Michael Rama ang mga civil engineers sa Cebu City ug uban pang mga structural engineers sa pagtabang sa siyudad pagsusi o inspeksyon sa mga buildings sa siyudad tungod sa nahitabong linog kagahapon.

Si Rama kinsa miadto sa nahugno nga Pasil Fish Market kagahapon sa buntag mitug-an sa mga tigbalita nga nagkinahanglan ang siyudad og mga eksperto sa mga buildings sama sa mga engineers nga motabang sa pagsusi sa mga buildings sa siyudad.

Matud pa ni Rama nga mas maayong masusi sa mga engineers ang mga buildings aron matan-aw kung safe ba gyud kini.

Lakip sa gipanawagan ni Rama   mao ang mga pribadong kontraktor sa mga private construction firms nga motabang sa Cebu City Disaster Risk Reduction Management Council.

Giangkon ni Rama nga kayahon sa Office of the Building Officials ang pag-inspeksyon sa tanang buildings.

Sa dalan Colon ug Manalili, daghang mga buildings ang nangaguba human nangatagak ang mga gabok na nga bahin niini gikan sa ibabaw padung sa ubos.

Wala hinuoy mga tawong nasakitan sa dalan Colon apan sa ubang mga bahin sa siyudad dunay mga tawong nakalas sama sa nahitabo sa Pasil Fish Market.

Sa dalan N. Bacalso nahugno ang karaang building nga Budget Builders hinuon walay na-report nga nasakitan sa maong insidente.

Samtang maayong pagkapahak usab sa ibabaw nga bahin sa Cebu Doctors University diha sa North Reclamation Area atol sa linog. (BANAT NEWS)