CEBU, Philippines - Dili pa kaayo daghan ang nakasang-at sa ilang certificates of candidacy (COC) aron magpapili pagka kapitan ug konsehal sa lainlaing barangay dinhi sa dakbayan sa Sugbo karong Oktobre 28.
Ang rekord sa Commission on Elections (Comelec) nagpakita nga 561 pa lang ang naka-file og COC dinhi sa dakbayan hangtud kagahapon sa ala 1:30 sa hapon.
Sigun sa talaan sa opisina ni Election Officer Marchel Sarno nga sa 262 nga naka-file na sa ilang COC sa mga barangay sa north district, 28 niini ang midagan sa pagka kapitan.
Sa south district, miabot na og 299 ang naka-file sa ilang COC hangtud kagahapon sa ala 1:30 sa hapon apan ang mga kawani sa Comelec wala makabutyag kun pila na ang midagan sa pagka kapitan sa mga barangay sa south district.
Si Atty. Sarno mibana-bana nga adunay mga 2,000 ang mo-file og COC sa 80 ka barangay dinhi sa dakbayan. Nagpasabot nga wala pa gani makaabot og katunga ang nakapasaka sa ilang COC.
Dunay mga kandidato nga naghugpong sa kompleto nga “team†sa pag-adto sa Comelec aron pagpasaka sa ilang COC.
Matud ni Sarno nga kadtong nakapasaka na sa ilang COC dili una tugutan nga makapangampanya samtang wala pa magsugod ang siyam ka adlaw nga campaign period sugod karong Oktubre 18.
Si Sarno miingon nga kadtong mga masakpan ug mahitabo nga makadaug nga dili pa maresolbar ang kaso apan sa ngadto-ngadto masuta nga sila nakahimo gyud og salaud, matangtang gihapon sila sa katungdanan.
Matud ni Sarno nga nagtoo siya nga modaghan ang mga mopasaka sa ilang COC kun magkaduol na ang deadline karong Huwebes. (/EIM) (BANAT NEWS)