CEBU, Philippines - Nadakpan sa kapolisan ang usa ka tawo nga naghupot og mga kahimanan sa paggamit og shabu didto sa sitio Ihawan, barangay Mantuyong sa dakbayan sa Mandaue sa miaging kaadlawon.
Si PO2 Modesto Lutchavez sa kapolisan sa Presinto 1 sa Mandaue City Police Office (MCPO) nga nagbase sa barangay Centro miila sa dinakpan nga mao si Harvin Baisac, 28, minyo, nga taga Zone 7, sa barangay Mantuyong sa maong dakbayan.
Matud pa niya nga kasamtangan nilang gihingusgan ang pagpatrolya sa panahon sa kagabhion sa pipila ka kabarangayan sa maong dakbayan. Usa sa tinguha niini nga aron ilang mapakgang ang mga illegal nga kalihokan sa maong lugar.
Matud pa ni PO2 Lutchavez nga sila si PO2 David Umambac ug PO1 Renato Berdon maoy nagpatrolya sa maong lugar dihang nasigpatan niini ang maong suspetsado nga nagdala og kahimanan sa paghingus shabu.
Maoy hinungdan nga ila kining gisakmit ug gidakop ang suspek.
Si Baisac nga nagtingkagol na karon sulod sa ilang detention cell gitakda nga ilang pasakaan og kaso nga kalapasan sa Section 12 sa Article 2 ubos sa Republic Act 9165 kon Comprehensive Dangerous Drug Act of 2002. (/WC) (BANAT NEWS)