CEBU, Philippines - Gitakdang manira nga temporaryo ang Vicente Sotto Memorial Medical Center (VSMMC) sa pipila ka mga lawak niini alang sa ilang tinuig nga pagpanghinlo karong sunod semana.
Si Dr. Gerardo M. Aquino Jr., hepe sa DVSMMC mibutyag sa Banat News nga maong mga lawak nga sirhan karong Oktubre 17-26 mao ang delivery ug labor room, Ward 1, Ward II ug ang Neonatal Intensive Care Unit. Miingon si Dr. Aquino nga modawat sila og emergency cases sa Oktubre 14, 2013 lang.
Hinuon sa maong panahon usab hatagan og igong higayon ang mga social worker nga mopagawas sa ubang mga pasyente nga anaa sa nahisgutang mga lawak sa gitakdang limpyohan, sumala ni Dr. Aquino,
Midugang usab ang hepe sa tambalanan sa lalawigan nga dili sila modawat og pasyente sulod sa maong mga adlaw nga gikan sa Oktubre 17 ngadto sa Oktubre 26, 2013.
Hinuon midugang siya nga ang mga pasyente nga gikan sa mga habagatang lungsod ning lalawigan mahimong ilang ihatud ngadto sa Talisay District Hospital sa dakbayan sa Talisay, ug sa St. Anthony Mother and Child Hospital sa dakbayan sa Sugbo.
Samtang ang mga pasyente nga gikan sa amihanang bahin sa Sugbo mahimong adto nila ihatud ang ilang mga pasyente sa Eversley Child Sanitarium and General Hospital sa Jagobiao, dakbayan sa Mandaue.
Apan midugang si Dr. Aquino nga kun dili na dawaton sa maong mga tambalanan, mahimong ideretso sa mga tagtungod ang ilang pasyente ngadto sa Cebu City Medical Center sa dakbayan sa Sugbo.
Kining maong lakang usa ka pagpaandam sa publiko kalabot sa temporaryo nga pagpanira sa DVSMMC sa mga nahisgutang departamento sa maong tambalanan alang sa hinlo ug luwas nga mga lawak ug kahimanan unya sa maong hospital.( /WC) (BANAT NEWS)