Mga anapog, balas ug graba gisakmit sa penro

CEBU, Philippines - Tulo ka mga dumptrucks ug usa ka multicab ang puno sa anapog, balas ug graba ang gisakmit sa mga sakop sa Civil Security Unit ilawom sa kamandoan sa Provincial Environment and Natural Resources (PENRO) sayo sa buntag kagahapon gikan sa lungsod sa Compostela ug siyudad sa Toledo.

Si Atty. Chad Estella mitug-an sa Banat News nga dunay tulo ka mga dumptrucks nga nadakpan sa checkpoint sa CSU sa barangay Magdugo sa Toledo City. Sumala pa ni Estella nagdala kini og mga graba ug balas nga gituohang dad-on sa mga construction sites sa Metro Cebu diin dunay taas nga demand sa maong mga materyales.

Matud pang Estella wala makapakita og Delivery Receipts (DR) ang mga drayber sa maong mga trak maong gisakmit ang ilang mga sakyanan ug karon gikostudiya na sa Toledo City Police Station.

Samtang sa lungsod sa Compostela, usa ka dumptruck nga dunay dalang anapog ug usa ka multicab nga dunay kargang balas usab ang gisakmit sa CSU pinangulohan ni Loy Madrigal diha sa barangay Poblacion.

Matud pa ni SPO3 Ernesto Pepito, desk officer sa Compostela Police Station sa pakighinabi sa Banat News nga wala makapakita og delivery receipt ang mga drayber sa maong trak ug multicab nga sila si Alfred Pareja ug Felizardo Coitmingao maong gisakmit kini. Si Estella nagkanayon nga nakalapas sa Provincial Revenue Ordinance ang maong mga drayber.

“Way mga delivery receipt or wala gyuy mga permits. Bisan Sabado o holidays especially kanang gabii ug kaadlawon mao nay ilang operation,” matud pang Estella. Midugang si Estella nga ang kada sakyanan nga madakpan sa maong kalapasan pamultahon og tag P10 mil kada usa. (BANAT NEWS)