Administrador sa CSBT pailisan
CEBU, Philippines - Wa pay action si Gobernador Hilario “Junjun†Davide III bahin sa petisyon sa kapin sa 160 ka mga vendor batok sa administrador sa Cebu South Bus Terminal (CSBT).
Ang maong petisyon nagtumbok sa "attitude problem" ni administrador Vicente Dejoras Jr. sa CSBT nga nahinawayan pag-ayo sa mga petisyoner. Sa ilang petisyon ilang gibutyag nga si Dejoras kusog kaayo maninghag kanila, mosinggit uban sa mga sakit kaayong pulong nga dili desente. Mogamit og mga pulong nga di ikasuwat hinungdan nga nawad-an na og respeto kaniya ang mga petisyoner.
Magpaka-Ginoo kuno si Dejoras ngadto sa mga petisyoner gumikan sa kamenus niya og pagtan-aw sa kakabus sa mga vendor.
Ang mga petisyoner midugang nga usahay di kalikayang mosipyat sila apan gusto nila nga pahimangnoan sila sa maayong mga pulong ug di unta sila iniroon sa pagkasaba.
Gumikan niini mihangyo sila sa gobernador nga unta pailisan si Dejoras nga maoy nagdumala sa CSBT. Sa pagkakaron gitakda pang imbistigahon sa gobernador si Dejoras. (BANATNEWS)
- Latest
