CEBU, Philippines - Nigawas karon ang report nga si kanhi Cebu Customs District Collector Edward Dela Cuesta posibling mabalik sa katungdanan niini subay sa nagpadayon nga paglahugay sa mga dagkong mga opisyal sa Bureau of Customs.
Hinuon ang buhatan ni kasamtangan nga Cebu Customs Collector Atty. Raul Alcazaren wala pa mokonpirmar sa nahisgutang kalambuan. Apan si Alcazaren nagkanayon nga magpadayon sa iyang katungdanan bisan pa man kun adunay Temporary Restraining Order (TRO) nga gipagawas.
Matud ni Alcazaren nga andam usab siya nga manaog sa iyang katungdanan kun adunay bag-ong order nga magmando kaniya sa pagkanaog sa maong posisyon. Iyang gipasabot nga bisan kun adunay TRO wala pa malibkas ang Customs Personnel Order nga giluwatan ni Custom Commissioner Ruffy Biazon nga gipetsahan og Septembre 30 nga nagtudlo kaniya isip OIC sa BOC.
Sayo niini si Collector Lourdes Mangaoang mideklarar nga siya ang labing taas og ranking sa mga opisyal sa BOC Cebu ug angayang molingkod isip district collector tungod kay aduna may TRO nga naglibkas sa iyang assignment sa Department of Finance under floating status.
Si Mangaoang maoy kanhi Deputy Collector for Assessment sa Port of Cebu sa wala pa siya mapailawom sa floating status. (BANAT NEWS)