Patay nga naglutaw sa dagat nailhan na

CEBU, Philippines - Ang patay’ng lawas sa usa ka lalaki  nga  napalgang naglutaw-lutaw  sa kadagatan sa FF Cruz, reclamation area sa dakbayan sa Mandaue sa miaging  hapon giila  sa mga  kabanay. Si PO1 Genus Capangpangan sa homicide section sa kapolisan sa maong dakbayan miila  sa biktima nga  si Marvin Tupas, hingkod, nga taga purok Butterfly sa barangay Pusok, dakbayan sa Lapulapu.

Matud pa ni PO2 Capangpangan nga ang mga sakop sa Philippine Coast Guard (CG) nga nagsakay sa ilang patrol boat maoy nakakaplag sa  patay’ng lawas  ni  Tupas.

Dali kini nilang giugkat ug gidala sa daplin sa FF Cruz sa reclamation area sa maong dakbayan. Ang mga sakop sa homicide section sa Mandaue City Police Office (MCPO) nga gipahibalo sa mga sakop sa PCG dali nga misusi sa maong patay’ng lawas.

Nakuha  nila  sa bulsa  sa     karsones niini ang   iyang cellphone.

Apan wala  sila  maka-abli  niini  tungod  kay  nahumol  sa tubig sulod sa pipila ka oras nga nakaaghat kanila sa pagtangtang  sa sim card.

Dayon  ila  kining  gitaod  sa   laing cell phone nga maoy ilang gigamit sa pagtawag  sa mga kabanay base usab sa nakita nilang mga numero sa sim niini.  Ang mga kabanay  ni  Tupas  misusi  dayon niini  ug  positibo   nga  miila  sa  maong  biktima. Apan walay  usa  sa  mga  kabanay  nga  nasayud  unsay  hinungdan  sa kamatayon  sa biktima,nalumos  ba  o  kaha  gipatay  ug  gitambog  sa  dagat.

Si PO1 Capangpangan miingon nga ilang giawhag ang mga kabanay  ni Tupas  sa pagpa- autopsy  niini  sa pagsuta sa hinungdan sa iyang kamatayon.  (BANAT NEWS)