3 ka tawo naghikog

CEBU, Philippines - Tulo ka mga tawo usa kanila menor de edad ug tinun-an sa high school ang naghikog patay sa managlahing lugar sa Sugbo kagahapon ug sa miaging adlaw.

Patay si Mark Kenneth Marquez, 20 anyos, residente sa sitio Das Uno, barangay  Don Andres Soriano sa dakbayan sa Toledo.

Basi sa spot report sa kapolisan diha sa Cebu Provincial Police Office, nakit-an na lang sa silingan nga nagbitay sa iyang kwarto si Marquez alas 6:00 sa gabii sa miaging adlaw.

Matud pa nga gisugo ang 14- anyos nga silingang babaye sa apohan sa biktima nga ipapangita ang apo niini ug mao na lay nakit-an sa maong babaye nga nagbitay na ang maong biktima. Ang mga niresponding polis pinangulohan ni PO3 Alfredo Barquin nagtuo nga walay foul play sa maong hitabo.

Samtang sa dakbayan gihapon sa Toledo City, usa ka third year nga tinun-an sa high school ang naghikog diha sa ilang panimalay gumikan sa kasagmuyo ngadto sa iyang igsuon.

Ang maong babayeng tinun-an napalgan na lang nga nagbitay na ug may pisi sa iyang liog diha sa ilang balay sa barangay Bato sa maong siyudad.

Ang kapolisan sa Toledo naghimo pa og imbestigasyon sa maong insidente.

Samtang napalgan na lang nga wala nay kinabuhi sa katabang nga nagbitay na si Antonio Jenefer Nonong Himalarin, 58,  diha sa balay niini sa Merryville Subdivision sa barangay Talamban ning dakbayan sa Sugbu.

Ang katabang nga si Jocelyn Narvasa maoy nakadiskubre kang Himalarin  samtang ang nahauna naglimpyo sa balay. Matud pa nga ang pisi gihikot ngadto sa iron grill sa pultahan nga gihikot usab sa liog ni Himalarin.

Ang mga sakop sa Emergency Rescue Unit Foundation daling miresponde apan mideklarar nga “zero vital signs” na kini.

Ang Crime Scene Investigation Unit nakarekober og lima ka metros nga pisi, usa ka botelya sa bino ug usa ka lingkoranan sa crime scene ug nasuta nga wala kini  samad sa lawas sa namatay.  (BANAT NEWS)