CEBU, Philippines - Milihok na ang kasong malversation of public funds and property batok sa dakong opesyal sa Bureau of Fire and Protection. Gipahigayon kagahapon ang pre trial sa kasong giatubang ni Fire Inspector Myla Selma sa RTC branch 5 .
Siya gipasakaan og kasong two counts of malversation of public funds and property tungod sa nahitabong kawat sa krudo ug gasolina sa Labangon samtang siya pa ang fire marshall sa dakbayan sa Sugbo niadtong Disyembre 2002. Giingong dunay pagtugot sa maong opisyal ang pagkahanaw sa maong mga krudo ug gasolina. Girekomendar siya nga makapiyansa og P40 mil sa duha ka mga kaso.
Usa sa makapanimbawot nga binuhatan sa opisyal kay iyang gibaligya nga 20 litros nga krudo kay matud pa ipalit og regalo sa kasal sa iyang kaubang opisyal kaniadto. Gikataho usab nga gi-dismiss na sa trabaho ang maong opisyal.
Kagahapon gihan-ay sa korte ang mga saksi ug ebidensiya alang sa paspas nga pagtaral sa maong kaso. (BANAT NEWS)