BOPK nangreklamo kay way apil

CEBU, Philippines - Mireklamo pag-ayo ang mga opisyal sa barangay nga gihulagway nga alyado sa Bando Osmeña Pundok-Kauswagan (BOPK) kabahin sa pagpanghatag sa hinabang-salapi alang sa mga senior citizens karong adlawa ug ugma.

Matud ni Konsehal Michael Ralota, presidente sa Association of Barangay Councils (ABC), nga ang administrasyon ni Mayor Michael Rama wala makig-coordinate kanila nga mga kapitan nga alyado sa BOPK.

Gibutyag ni Ralota nga ang lista sa mga senior citizens nga makadawat sa tag P2,000 nga laing cash assistance gikan sa City Hall atoa gihatag sa mga konsehal sa barangay nga alyado sa Team Rama.

Kun ang barangay walay mga konsehal nga alyado sa Team Rama, matud ni Ralota nga ang kopya sa mga senior citizens nga beneficiaries sa cash assistance program atoa gihatag sa mga lider ni Rama nga dili opisyal sa barangay.

Si Ralota miingon nga mosang-at sila og protesta apan gituohan hinoon kini nga walay kapuslanan kay ang maong reklamo adto ra usab niya isang-at sa opisina sa mayor.

Sa buwag nga press conference, si Rama nagkanayon nga iyang gitahasan ang iyang mga lider sa barangay nga moabag sa pag-asikaso aron ang pagpanghatag sa cash assistance sa mga senior dili magkaproblema.

Matud ni Ralota nga wala hinoon sila’y tinguha nga pugngan ang pagpanghatag sa tag dos mil pesos ngadto sa mga tiguwang.

Kun mahatag kining maong tag P2,000 sa mga senior, duna pa gihapon sila’g kobrahonon nga tag P4,000 karong Disyembre. (BANAT NEWS)