Talisay nag-una sa daghang kaso og carnapping
CEBU, Philippines - Sa 50 ka mga police stations sa tibuok lalawigan sa Sugbo, ang Talisay City Police Station maoy nag-una sa labing daghan og kaso sa karnap nga motorsiklo gikan sa pagsugod ning tuiga hangtud sa buwan sa Agosto base sa statistics sa Cebu Provincial Police Office.
Si Sr. Supt. Noel Gillamac, direktor sa CPPO, mibutyag nga dili ingon ana kadaghan ang kapulisan sa Talisay apan kinahanglang anaa sila sa saktong lugar ug saktong oras base sa crime clock.
Base sa record ang Talisay City Police Station adunay 31 ka mga kaso sa carnapped ug 29 niining kasuha ang wala pa masulbad, duha ang cleared ug usa pa lang ang nasulbad.
Gisundan kini sa Danao City Police Station nga adunay 19 ka kaso diin 17 ang unsolved ug duha ang cleared.
Ang ikatulo mao ang Minglanilla Police Station nga may 10 ka kaso ug walo niini ang wala masulbad, duha ang nasulbad na ug laing duha ang cleared.
Si Gillamac miklaro nga ang cleared nga kaso mao kadtong identified na ang suspek ug napasakaan na og kaso apan wala masikop samtang kadtong solved mao ang mga kaso nga nasikop gyud ang suspek sa paghimo sa maong krimen.
Sa iyang bahin, si Supt. Resty Santos, hepe sa Talisay City Police Station, mibutyag nga ilang gipadayun sa monitoring ang mga suspetsado sa maong pagpangawat og motor. (BANAT NEWS)
- Latest
