CEBU, Philippines - Hatagan og gahum ang mga security guards sama sa kapolisan ug ubang awtoridad. Kini ang tumong sa giduso nga balaudnon ni Kong. Gwendolyn Garcia sa ikatulong distrito sa lalawigan sa Sugbo.
Ang House Bill 2382 nga giduso ni Garcia nagtumong sa pagpabug-at sa responsibilidad sa usa ka security guard sama sa usa ka polis ug bodyguard sa usa ka taas nga opisyal sa gobyerno.
Matud pa ni Garcia nga ang usa ka security guard adunay kaakuhan sa pagpanalipod sa kinabuhi ug butang sa iyang amo ug sa katawhan nga anaa sa iyang palibot.
Sumala pa ni Garcia nga ang presensiya sa usa ka security guard sa usa ka dapit importante kaayo, mapribado man ug pangpubliko.
Iyang gisanglitanan ang mga panghitabo sama sa tulis sa bangko nga ang security guard gyud ang unahon sa tulisan. Ang balaudnon ni Garcia mag-usab sa Artikulo 152 sa Akta Numero 3815 nga gitawag og Revised Penal Code ug malakip na ang security guards sa usa ka lehitimong ahensiya sa tawgon og "Agents of Person in Authority."
Ang agent of person in authority maoy gitahasan sa pagpatunhay sa kalinaw ug kahusay ug pagpanalipod sa kinabuhi ug kabtangan
Si Garcia miingon nga angayan lang nga ilakip ang mga security guards sa maong grupo.
Si Garcia nanag-iya usab og usa ka security agency nga ginganlan og GGC Security Group nga gidumala sa iyang anak nga si Pablo “Paolo†Garcia III sa dakbayan sa Sugbo. (BANAT NEWS)