CEBU, Philippines - Higpit nga ipatuman sa Department of Social Welfare and Development (DSWD) ang "Bawal ang Epal" nga kampanya ning nagsingabot nga election sa barangay.
Si Janice Sumalinog,Regional Grievance Officer sa DSWD7 mipasidaan kagahapon sa mga benepisyaryo sa Pantawid Pamilyang Pilipino Program (4Ps) nga magbantay sa ilang kaugalingon. Sa Kapihan sa PIA nga gipalanog sa DYMR mipasabot si Sumalinog nga dili angay mag-apil-apil sa pangampanya gamit ang unsa mang timaan nga sakop sila sa 4Ps.
Busa higpit nilang gidid-an ang mga benepisyaryo sa paglikay paggamit sa campaign material nga may markang 4Ps.
Kining mga materyala naglakip sa t-shirt, tarpauline, streamer, poster ug uban pang materyales sa pangampanyang politikanhon nga gamiton sa mga politiko sa ilang pangampanya.
Miingon siya nga tugotan nila ang ilang mga benepisyaryo nga mokandidato sa pagka-kapitan ug konsehal sa barangay basta di lamang sila modala sa ngalan sa 4Ps.
Kini tungod kay usa kini ka matang sa EPAL nga higpit nga gidili sa kadagkoan sa DSWD, sumala ni Sumalinog. Miingon siya nga ang EPAL usa ka terminolohiya sa pulong nga "Pagpapapel" sa bahin sa mga politiko.
Gani higpit nga gidili sa DSWD ang mga politiko nga mohulga sa mga benepisyaryo sa 4Ps nga dili nila patabangan sa DSWD kun dili mobotar kanila. (BANAT NEWS)