Sikyu nga tulisan nasikop

CEBU, Philippines - Usa ka security guard nga wanted sa kasong tulis sa Negros Oriental nasikop sa mga elemento sa Investigation and Detective Management Branch (IDMB) didto sa usa ka gasoline station sa Salvador Extension barangay Labangon sa alas 10:00 sa miaging gabii.

Ang maong suspetsado naila nga si Antonio Donan alias Tonton, hingkod ang panuigon nga nagtrabaho isip security guard sa usa ka gasoline station. Gipasanginlan ang suspetsado ug ang iyang mga kauban nga responsable sa pagtulis  sa usa ka Ceres Bus sa dakbayan sa San Carlos sa miaging tuig. 

Matud pa ni Sr. Insp. Mark Darroca sa operations office sa San Carlos City Police Office nga nasikop na ang tulo ka mga kauban ni Donan sa kapolisan sa Negros.

Ang hepe sa IDMB nga si Chief InspectorAileen Recla nagkanayon nga dunay mipahibawo kanila nga ang maong suspetsado nagtago-tago dinhi sa Sugbo busa mihimo dayon sila og intelligence gathering.

Nasuta sa maong intelligence gathering nga si Donan nagtrabaho isip security guard sa usa ka gasoline station busa gisikop siya sa  mga elemento sa IDMB pinasikad sa warrant of arrest nga giluwat ni Judge Danilo Amisola sa Regional Trial Court sa San Carlos City.

Nakig-alayon ang IDMB sa security agency ni Donan hangtod nga ilang nasikop kini niadtong Domingo sa alas 10:00 sa gabii.

Si Donan  miangkon nga siya ug ang iyang mga kauban ang mitulis sa Ceres bus sa miaging tuig ug  maoy  nagkuha sa mga celfone, kwarta ug  mga butang sa mga pasahero  sa bus.          

Miabot sa dakbayan sa Sugbo ang mga elemento sa San Carlos City Police Office nga midala kang Donan balik sa maong dakbayan.  (BANAT NEWS)