CEBU, Philippines - Gipahimangnoan ni Vice Gov. Agnes Magpale ang iyang mga kaalyado ug mga supporter nga mokandidato sa naghinangat nga barangay election nga dili gamiton ang iyang hulagway sa ipapilit niining mga campaign materials.
Si Magpale nagkanayon nga ang gustong mogamit sa iyang hulagway gikinahanglan nga moduol una sa iyang buhatan ug mananghid nga ilakip siya sa campaign materials sa kandidato sa pagka- opisyal sa barangay aron dili malibog ang mga tawo ug posibling makamugna og kasamok.
Iyang giklaro nga usa sa nag-una niyang gipanagan-an mao ang hugot unya nga pag-monitor sa Commission on Elecion (COMELEC) sa gidak-on ug unod sa mga campaign materials sa mga kandidato sa barangay.
Dugang pa niya nga ang iyang gikahadlokan mao nga mahisama unya siya sa nahitabo ni Presidente Aquino nga gipatakap ang hulagway sa social media network nga nagtapad ang presidente ug ang pork barrel queen Janet Lim Napoles.(/WC)(BANAT NEWS)