CEBU, Philippines - Naangol ang usa ka lalaki human kini dunggaba og gunting sa iyang maguwang nga babaye gumikan sa bangi nila sa cell phone didto sa sitio Laray, barangay Mohon, dakbayan sa Talisay kagahapon sa udto.
Ang biktima nailhan nga si Joebert Alsong hingkod, nagpuyo sa maong lugar, samtang ang suspek mao usab si Michelle Ortega, 21, molupyo usab sa maong dapit.
Si SPO1 Edwin Campomanes sa Talisay City Police Office mibutyag sa Banat News nga si Alsong ug Ortega managsoon lang sa inahan apan lainlain og amahan.
Miingon si SPO1 Campomanes nga sayo niini nagkalalis ang duha bahin sa cell phone.
Kini tungod kay nagbaylo og cell phone ang duha apan nasuko sa Alsong dihang nasayran nga giprenda ni Ortega ang iyang cell phone nga iyang gihatag niini. Sa kainit sa ilang komprontasi nasagpaan ni Alsong si Ortega.
Apan ang maguwang nga init usab kaayo og ulo, mikuha og gunting ug maoy iyang giduslak sa dughan sa biktima.
Ang biktima dali nga gihatud ngadto sa kapolisan sa Talisay City District Hospital, samtang mitahan usab dayon ngadto sa kapolisan si Ortega.
Wala’y plano nga mosang-at og kiha ang biktima batok sa suspek. (BANAT NEWS)