CEBU, Philippines - Usa ka lalaki ang nasubhan sa pag-epekto sa Comelec gun ban sa tungang gabii sa Septiyembre 28 niining tuiga human kini nadakpan sa kapolisan sa Sector 6 sa barangay Pagsabungan, dakbayan sa Mandaue alas 12:30 ang takna sa miaging tungang gabii.
Ang nadakpan mao si Jet Lee Patayan, 24, taga barangay Tingob sa maong dakbayan kinsa giingong nakuhaan og kalibre .38 rebolber nga adunay lima ka mga buhing bala.
Si SPO1 Gregorio Cabizares sa kapolisan sa Presinto 3 sa Mandaue City Police Office (MCPO) nga nahinabi sa Banat News miingon nga nakadawat sila og tawag sa telepono gikan sa usa ka concerned citizen nga nagpahibalo labot sa usa ka armadong tawo sa maong dapit.
Matud pa ni Cabizares nga ang team sa kapolisan sa Presinto 3 nga gipangulohan sa ilang hepe nga si Senior Inspector Genilo Veraque dali nga misusi sa barangay Pagsabungan. Ang suspek nga mitakdo sa deskripsyon sa concerned citizen daling gisitar sa mga polis apan giingong misuway pa og ibot sa iyang armas apan napugngan kini dayon ug gisikop ug diha na madiskubrehi ang iyang giluklok nga dili lisensyadong armas.
Kadtong mga tawo nga madakpan sa pagdala og walay lisensya nga armas atol sa gun ban sugod kagahapon mahimo na nga ikonbikto sa Illegal Possession of Firearms. Kini human nga giaprobahan na ang Republic Act 10591, ang bag-ong balaud nga nag-amendar sa Republic Act 8294 ug mi-repeal na sa Section-1 sa karaang Firearms Law.
Ang karaang Firearms Law naglatid nga kun ang tawo nga nadakpan sa pagdala’g armas nga walay lisensya dili mahimong ikonbikto sa Illegal Possession of Firearms kun nakahimo usab kini og laing salaud atol sa iyang pagkasikop.
Gipasabot sa mga huwes sa daghan na nga mga kaso nga kay ang mga dinakpan sa paghupot og walay lisensya nga armas nakalapas man usab sa gun ban nga gilatid sa Comelec, dili sila mahimo nga kombiktohon sa Illegal Possession of Firearms.
Sagad sa mga nadakpan gikonbikto lang sa paglapas sa gun ban nga ubos ra og silot kun itandi sa Illegal Possession of Firearms. Ang karaang balaud gikareport nga gituyo sa paghimo aron nga makagawas sa prisohan si Robin Padilla nga suod sa kanhi presidente.
Ang kapolisan dinhi sa dakbayan nga ubos ni Sr.Supt. Noli Romana miingon nga nalipay sila sa pag-aprobar na sa bag-ong balaud nga makapalig-on sa kampanya sa illegal possession of firearms. (BANAT NEWS)