Kinawat nga gadget natultolan tungod sa GPS

CEBU, Philippines - Gisikop sa kapolisan sa Guadalupe Police Station ang usa ka porter sa pantalan pasado alas-8  sa miaging gabii human magbitbit og usa ka bag nga dunay mga sulod nga nagkadaiyang gadgets ug laing usa ka bag nga adunay laptop sulod sa Pier 3 Terminal.

Ang nasikop si Gregorio Aros Jr. usa ka porter sa Trans Asia sulod na sa 15  ka tuig ug lumad nga taga lungsod sa Cordova.

Sa pakighinabi sa Banat News ni SPO4  Roy Salazar, duha ka batan-on nga kasamtangang nagpuyo sa Guadalupe ang nagpatabang kanila kalabot sa ilang i-pad ug laptop nga gilungkab niadtong Martes.

Ang i-pad sa biktima adunay Global Positioning System (GPS) hinungdan nga ila kini nga nasubay kun asa gidala niadtong Martes,  naabot sila sa barangay Lorega-San Miguel sa pagsunod-sunod niini apan giingong kalit nawala  ang tracking system niini dihang napalong ang maong i-pad.

Sa miaging gabii, gisuwayan na usab og subay sa mga batan-on ang ilang i-pad ug didto nasuta nga gipasiga na usab kini sa kung kinsa may mikawat niini ug ilang natultolan nga gidala kini sa Pier 3 maong nagpatabang sila sa kapolisan.

Si Aros nga nagdala og dakong bag nga adunay mga sulod nga nagkadaiyang gadgets maoy nakuptan sa kapolisan uban sa laptop bag nga adunay sulod nga duha ka laptop.

Daling gisikop si Aros  dihang sa paghiling sa sud sa gidala niyang mga bagahe atoa didto ang mga gamit sa biktima  apan si Aros mihimakak nga iyang kinawat ang maong mga butang.

Matud pa ni Aros nga igo lang siya nga gimandoan pinaagi sa text nga ipasakay sa barko padung Ozamis City ang maong bagahe.

Gisuta karun sa kapolisan kun aduna bay mga nagpaluyong sindikato sa maong operasyon. (/EIM) (BANAT NEWS)