CEBU, Philippines - Kapin sa 60 ka mga tawo lakip na mga bata gikan sa Zamboanga City ang mibiyahe og duha ka adlaw padung dinhi sa dakbayan sa Sugbu aron malikay sa kagubot didto nunot sa pag-atake sa Moro National Liberation Front nga naabot na og dul-an tulo ka semana.
Ang grupo mipahiluna sa balay sa ilang paryente diha sa sitio dakilang Pito dalan Tres de Abril, sa barangay Punta Princesa sa miaging adlaw.
Si Sherhan Daung, 39, lumolupyo sa barangay Talon-talon sa dakbayan sa Zamboanga miingon nga nakadesisyon sila nga mobakwit human namatay ang duha ka bata nga may edad nga duha ka bulan ug upat ka bulan sulod sa evacuation center.
“Mamatay pa man gani nang naa sa evacuation center kami na ba nga naa lang sa balay,†matud ni Daung.
Sumala pa ni Daung nga nag-uwan og bala sa ilang dapit gani ang mga bala sa .50 caliber nga gituohan nilang gikan sa Philippine Navy adto nangatagak sa ilang balay hinungdan sa ilang kahadlok.
Sumala pa nga nakadesider silang mobakwit dinhi human ang iyang 5- anyos nga anak miingon kaniya nga dili pa kini gustong mamatay. Matud niya daw gikumot ang iyang kasing-kasing sa pagkadungog niini.
Sumala pa ni Daung lisod kaayo karon ang kinabuhi didto tungod kay walay bangko nga abli ug sirado ang mga tindahan.
Si Maria Teresa Kahil nga nahinabi sa Banat News miingon nga dakong kahasol sa ilang pagpuyo ug naalkansi na siya sa iyang negosyo tungod sa gubat sa Zamboanga.
Matod pa ni Kahil nga nakadesisyon sila nga mobakwit sa Cebu kay malinawon man ang Sugbo ug naa sab ang iyang anak nga babaye nagpuyo dinhi.
Ang grupo mibiya sa Zamboanga City alas 8:00 sa buntag niadtong Martes ug naabot sila sa Tres De Abril sa miaging adlaw luwan sa usa ka Isuzu Forward ug usa ka Sports Utility Vehicle.
Ang ilang rota padulong sa Davao ug gikan sa Davao padulong sa Dapitan ug gikan sa Dapitan padulong sa Samboan sa Cebu diretso sa dakbayan sa Sugbo.
Mikabat og duha ka adlaw ang ilang byahi apan wala nila kini panumbalinga maluwas lang ang ilang kinabuhi sa pagkakaron. Hinuon buot gihapon silang mamalik didto kun mabalik na ang kalinaw sa Zamboanga.
Nanawagan si Kahil nga tabangan unta sila sa kagamhanan sa dakbayan sa Sugbo ug mihangyo kini nga ipailawom sila sa stress debriefing ilabi na ang mga bata. (/EIM)(BANAT NEWS)