28 ka barangay higpit nga bantayan atol sa eleksyon

CEBU, Philippines - Ang Regional Joint Security Coordinating Council (RJSCC) 7 duna nay natumbok nga 28 ka mga barangay sa Central Visayas isip mga “areas of concern” sa umaabot nga eleksiyon sunod buwan.

Sa 28 ka barangay, 27 niini nahimutang sa Negros Oriental Province ug usa sa Siquijor province samtang gi-monitor pa sa kapulisan ang Cebu Province ug Cebu City, si Police Regional Office (PRO) 7 director Danilo Constantino nagkanayon.

Si Constantino ang ni-representar sa Philippine National Police sa gipahigayon nga ikaduhang RJSCC meeting kagahapon tali sa Armed Forces of the Philippines ug sa Commission on Elections (Comelec) 7.

Si Constantino nagkanayon nga ang 28 ka barangay nagkinahanglan og atensiyon tungod sa intense political rivalry sa mga kandidato sa nanglabay’ng mga eleksyon. “Based sa previous record, may election-related incidents, intense political rivalry at presence of CPP-NPA (Communist Party of the Philippines-New People’s Army) sa mga barangays na ‘to,” asoy pa ni Constantino Ang maong gidaghanon  posible pang madugangan  o mo-ubos samtang nagkaduol ang eleksyon, ilabina  human sa filing sa Certificate of Candidacy (COC) karong Oktubre 11-17, dugang pa niya.

Si Cebu Provincial Police Office (CPPO) director Noel Gillamac, Cebu City Police Office (CCPO) director Noli Romana, ug Lapu-lapu City Police Office (LLCPO) director Rey Lyndon Lawas nagkanayon nga wala pa sila’y na-monitor so far nga mga election-related violence sa ilang jurisdiction.

Si Constantino nagkanayon nga ang PRO 7, inabagan sa Central Command, andam na sa ilang seguridad para sa eleksiyon karon pa lang ug ang ilang kampanya batok sa loose firearms gipahingusgan nang daan bisan ang election gun ban karon pang Sabado sa Septiyembre 28. “We’re well-prepared and we’re banking on the support from the AFP and CentCom,” deklarar sa PRO 7 director.

Kun itandi sa national elections, mas nagkinahanglan og mas kuti nga preparasyon ang barangay elections, matud pa sa Comelec 7 regional director nga si Temie Lambino, kinsa nangulo sa RJSCC 7. “This is a grassroots election, so it’s a more serious matter. Based in statistics, higher ang turn-out sa votes during barangay elections, so there’s greater preparation needed habang paparami ang tao,” matud pang Lambino.  (/EIM) (BANAT NEWS)