CEBU, Philippines - Hingpit na nga gilubong kagahapon sa buntag ang 47 ka mga patay’ng lawas sa wala hiilhing mga biktima sa nalunod nga MV Saint Thomas Aquinas didto sa Carreta Cemetery.
Niadtong Martes sa gabii gisugdan na og hakot sa mga taga Cosmopolitan Funeral ang mga patay’ng lawas paingon ngadto sa sementeryo sa Carreta.
Pasado alas 12:00 sa tungang gabii hingpit kini nga nasulod na sa tagsa-tagsa nila ka mga nitsu pinaagi sa numbering.
Usa sa mga tagtungod sa nabiktima sa pagkalunod sa maong barko miingon nga padayon pang nangita sa iyang asawa, duha ka bulan nga anak ug bayaw, ang miuban sa paghatod sa mga minatay. Si Dionilo Carahian nga lumad nga taga Mindanao ug kasamtangang nagpuyo sa Pasay City, Metro Manila, tuyong mianhi sa Sugbo niadtong Martes sa gabii aron sutaon ang gipahibalo kaniya sa iyang kahigalaan.
Matud pa ni Carahian nga kawalo mag -missed call kaniya ang iyang asawa apan wala siya makatubag tungod sa iyang trabaho.
Dihang iya kining natubag nagtiyabaw na ang iyang asawa nga mipahibalo kaniya nga nalunod ang gisakyan niining barko.
Naglaum si Carahian nga unta iya nang masayran sa labing madaling panahon kun asa ug naunsa na kaha ang iyang asawa ug anak tungod sa kasakit nga iyang gibati.
Giingong ang iyang pamilya gikan sa Butuan City ug padung unta kini nga moapas kaniya sa Pasay City. (BANAT NEWS)