2 angol sa pagpamusil didto sa Lapulapu

CEBU, Philippines - Angol  ang  usa  ka  lalaki  ug  ang  drayber  sa traysikol human kini pusila sa nagsakay og  motorsiklo  didto  sa barangay  Gun-ob  dakbayan  sa Lapulapu  sa miaging  gabii.

Napusilan mao si Junrey  Bascones, 37, ulitawo nga taga  Duljo, Fatima sa  dakbayan sa Sugbo, samtang  ang  nasabak  usab  sa saag  nga  bala  ug  naangol     mao si Dexter  Esmiro, 43, nga taga barangay Canjulao sa dakbayan sa Lapulapu.

Si PO2 Winston Ybanez sa homicide section sa kapolisan sa maong dakbayan nga nahinabi sa Banat News miingon nga naigo  sa tiyan ug dughan si Bascones samtang  sa  walang abaga usab ang igo ni Esmiro sa maong pagpamusil.

Miingon  si  PO2 Ybanez  nga  milabang  sa karsada  si  Bascones  dihang  giluthang  kini  sa  mga  kriminal.

Samtang  si  Esmiro  nga  milabay  usab  sa maong  lugar  aron  mamasahero,  naigo  usab  sa saag  nga  bala  apan  dili  siya  maoy  target  sa maong  pagpamusil.

Matud pa ni PO2 Ybanez nga human  masabak  ang  mga  biktima dali nga mipabulhot sa pagpadagan sa ilang motorsiklo ang duha ka wala hiilhing lalaki nga pulos nag-jacket ug  nagsul-ob og close type nga helmet.

Dugang pa ni PO2 Ybanez nga higpit karon nilang gibantayan sa  sulod  sa tambalanan   nga  gipatambalan  ni Bascones  ug Esmiro.

Natingala  ang  kapolisan kay gawas nga  daghan  og patik sa lawas  ang  biktima,  may   sketch  ug  address   ug ngalan sa mga tawo  silang  nakuha  gikan  niini.

Si SPO1 Allan Pantaleon sa homicide section sa kapolisan sa maong dakbayan nga nahinabi sa Banat News miingon nga susihon nila ang gidala nga sketch sa maong lalaki   ug  ang  mga ngalan ug address sa mga tawo nga gipangita niini.

Ang kadaghanan   sa  maong  mga  ngalan  pulos taga dakbayan sa Sugbo ug pipila usab ang taga dakbayan sa Lapulapu. (/WC)(BANAT NEWS)