CEBU, Philippines - Patay ang usa ka medical representative samtang samaran usab ang usa ka babaye human sila makuryentihi sa ilang alambre nga halayhayan pasado alas-6 sa miaging gabii diha sa sitio Pagutlan barangay Tayud lungsod sa Consolacion.
Ang namatay nailhan nga si Manny Comendador, 28, molupyo sa dapit samtang ang samaran mao usab ang iyang silingan nga si Teresa Monleon, 33. Sa pakighinabi kang Monleon, mipadayag nga nagbulkas siya nianang pasado alas 5 sa miaging hapon sa iyang gihayhay nga banig sa alambre sa likod nga bahin sa ilang panimalay.
Paghikap ni Monleon, iyang nabatyagan nga susama sa mikuryenti ang banig apan wala lang kini niya panumbalinga sa dihang iyaha na gyud kining gikuha didto na siya mikirig ug napilit siya ngadto sa alambring hayhayan.
Tungod niini, daling gitabang si Monleon ni Gina Bohol pinaagi sa pagbira sa buhok niini hinungdan nga wala kaayo kini magrabihi ug samad lamang sa iyang walang kamot nga diriyot usab mapikas ang kumingking ang iyang nahiaguman.
Samtang gitabang si Monleon ang asawa sa namatay nga si April Rosales mipadayag nga dihang gitabang si Monleon dali usab siyang nangita og kasakyan aron dali kining madala sa tambalan.
Apan sa pagbalik ni Rosales, ang iya na usab nga bana nga si Comendador ang gitabang sa mga tawo kay kalit usab nga mihagba dihang nasangit sa grounded nga alambre.
Nakabsan sa kinabuhi ang iyang bana kinsa swerteng nabuhian ang lima pa ka buwan nilang anak sa dihang nakuryentihan kini. (BANAT NEWS)