ARTA higpit nga gipatuman sa CSC7

CEBU, Philippines - Higpit  nga  gipatuman  sa Civil Service Commission (CSC)7 ang Anti Red Tape Act (ARTA) sa tanang  lokal  ug  nasudnong ahensya  sa kagamhanan  dinhi  sa Kabisay-an.

Si CSC7 Chief Personnel Specialist  Prolaine Daclan mibutyag kagahapon  nga mao kini ang  gibantayan  pag-ayo  sa  mga tinugyanan  sa CSC. Pipila  sa  mga  gipangayo sa  ARTA sa  matag  buhatan  ug ahensya  sa  goberno  mao  ang  Citizen's Charter  nga  ibutang  sa  tarpaulin nga  anha  itaod  atubangan  o abansadang  lugar sa maong buhatan nga  mabasa  dayon  sa publiko.

Matud  pa  ni Daclan nga  sa  ARTA isuwat  ang Vision ug Mission  sa maong  buhatan, isuwat  usab  ang  mga serbisyo  nga  idalit  niini  ngadto  sa publiko, ingon  man  ang  mga pamaagi. Ubos  niini  han-ayon pag-ayo  kun unsay  una, ikaduha  ug  tanang  mga  lakang  nga  himoon  sa kliyente  sa paghikay  sa  tuyo  ug  pangayuon  niini sa maong  buhatan.

Kinsa  ang  tawong  duolon, unsay gidugayon  nga  mahuman  ang  maong  tuyo, mga dokumento  nga gikinahanglang  dad-on  sa kliyente  ug  pila  usab  ang  bayranan  niini.

Midugang  si Daclan  nga  sa maong ARTA ibutyag usab  ang  mga  pamaagi  sa pagsang-at og  reklamo  ngadto  sa maong  buhatan.

Miingon  si Daclan  nga  sa maong  reklamo  mahimong  isulti  sa  kliyente  kun giserbisyohan  ba  sila  ug  wala  ba  magmugtok  ang  dagway  sa  kawani  nga  miserbisyo  kanila.

Sa ARTA  gipasabot nga walay  noon break  ang  matag  buhatan  sa goberno  aron  makasilbi  kini  sa panginahanglan  sa publiko panahon  sa tingpaniudto.

Matud  pa  ni Daclan  nga  gipasulabi  usab  sa maong  balaod  nga  kinahanglang  matag  buhatan  sa goberno  limpyo, may  lamesa  nga  duolan  sa kliyente, ug sa laktud  gihan-ay  sa maong  balaod  ang  maayong  serbisyo nga itunol  sa matag  kawani  ug  opisyal  sa goberno  nga duolan  sa kliyente.  (BANAT NEWS)