CEBU, Philippines - "Passion for Freedom" mao kini ang paghulagway ni Senate Blue Ribbon Committee Chairman Sen. Teofisto "TJ" Guingona II sa mga sakop sa media sa Sugbo atol sa iyang pakigpulong sa mga membro sa Cebu Federation of Beat Journalist (CFBJ) Assembly sa Parklane Hotel kagahapon sa hapon.
Matud pa ni Sen. Guingona nga buhi kaayo ang media sa Sugbu sa natad sa pagpakabana sa lokal ug nasudnon nga mga issue alang sa kasayuran sa mga Sugbuanon.
Dili basta-basta ang kinabuhi sa usa ka "beat journalist" gumikan kay kanunay kining makasab-an (beaten) sa iyang editor, news sources ug kanunay maggukod sa balita, sumala ni Guingona.
Si Guingona mipadayag nga walay makapugong sa mga journalist sa pagsulti sa matuod bisan pa sa mga hulga nga madawat niini.
Ang pagtambong ni Guingona sa maong kalihukan mao ang pagpaluag sa iyang hunahuna sa nagpadayon nga hearing sa Senado kalabot sa pork barrel fund scam.
Nanghinaut si Guingona nga ang kagamhanan makahatag og maayong benepisyo ang mga sakop sa media o journalist aron makapadayon kini sa iyang profession.
Ang CFBJ nagsaulog sa ika-13 ka tuig nga pagkatukod niini diin kagahapon mipahigayon sa ilang General Assembly ug Induction of Officers. (BANAT NEWS)