Task force Tabanao gitukod

CEBU, Philippines - Usa ka special investigation task group Tabanao ang gihulma Cebu City Police Office alang sa daling kasulbaran sa pagpusil patay sa public information officer sa Philippine Drug Enforcement Agency nga si Jesus “Jessie” Tabanao.

Si CCPO director Sr. Supt. Noli Romana mibutyag sa mga tigbalita kahapong adlawa nga langkoban ang maong task group sa Investigation and Detection Management Branch, Criminal Investigation Branch, Homicide Section ug sa Fuente Police Station.

Matud pa ni Romana nga matag karon ug unya ang ilang buhatong case conference alang sa update sa kaso ni Tabanao .

Si Romana miingon nga ilang gisubay  ang tanang anggulo apan prayoridad sa ilang imbestigasyon niini nga may kalabotan kini sa trabaho ni Tabanao.

“Priority namin ang work related, if we are to profile the victim ‘yong lifestyle niya more focused kasi sa trabaho he being a 35 years old and a PDEA agent,” matud pa ni Sr. Supt. Noli Romana.

Dihang gipangutana sa mga sakop sa media si Romana kung may kalabotan ba sa drugas ang maong insidente mibutyag siya nga posibleng may kalabotan ang mga naaresto sa PDEA.

“Possibly doon sa mga na-arrest sa mga operation that they have conducted, we are backtracking the events immediately preceeding this incident,” matud pa ni Romana.

Nagtuo ang mga imbestigador nga gun for hire ang gunman tungod sa estilo sa pagpusil nga siniguro gyud nga iyang mapatay ang biktima.  Subayon sa kapolisan kung asa naggikan si Tabanao sa maong gabhiuna ug ipailawom usab sa digital forensics ang duha ka cellphones ni Tabanao nga ang usa niini walay sim card.

Samtang ang hepe sa Criminal Investigation and Detection Group 7 nga si Sr. Supt. Ritchie Posadas mibutyag nga motabang ang ilang buhatan sa imbestigasyon sa maong kaso.

“Yes, definitely CIDG will be helping the investigation,” matod pa ni Posadas apan iyang gipasalig nga dili maka-complicate ang ilang himuong imbestigasyon sa gihimo sa CCPO.

 Mihangyo si Romana sa mga nakasaksi nga magpatim-aw aron makahatag kini’g mga dugang pang kasayoran kay hangtod niining higayona naglisod sila sa kooperasyon sa mga saksi.

 Si Cebu City Michael Rama mimando sa kapolisan nga pangitaon ang responsable sa kamatayon ni Tabanao.

“Bring the perpetrators out as quickly as we can,” matud ni Rama

 Si Rama mi-acknowledge usab sa column ni Lloyd Suarez nga posibleng “inside job” ang pagpatay ni Tabanao.

Gani matud ni Rama nga dunay mga butang nga angay kutihon og susi sama sa kwarta.

“There are things and circumstances that lead to the killing incident like the involvement of money,” dugang ni Rama. (BANAT NEWS)