Leadership training sa RAFI gitambunga’g 70

CEBU, Philippines - Dul-an sa 70  ang   mga misalmot   sa leadership  training   nga  gipahigayon  sa Ramon Aboitiz Foundations Inc. (RAFI) sa miaging  adlaw.

Ang  mga  misalmot  pulos    taga dakbayan  sa   Carcar , mga  lungsod sa Asturias ug  Liloan.

Gibansay  sila  bahin  sa hustong  paagi  aron  mahimong epektibong  lider  sa komunidad.

Matud pa ni Deputy Director for Youth Development Program Marie Sol Gonzalvo sa RAFI, nga ang mga magtutudlo nakasulay sa mga kalihukan   bahin  pagpalambo sa kolaborasyon, critical thinking, epektibong komunikasyon ug consensus building.

Si Tanya Amanda Flores, program officer  sa  RAFI nagkanayon  nga tuyo nila nga makahatag og mga pagbansay-bansay nga adunay  maayong  epekto ngadto  sa mga lider sa tunghaan.

Pinaagi  niini makabaton sila og dugang kaalam nga gikinahanglan sa pag-atubang sa mga nagkalain-laing kasinatian isip lider sulod sa tunghaan.

Dugang pa ni Flores nga kining maong pagbansay-bansay dili kasagaran busa nakaingon  siya  nga  suwerte  kadtong  nakatambong  niini.

Miingon si Flores  nga  gusto  nilang  dad-on  ang  mga  magtutudlo sa gawas  sa ilang  lawak  aron  makasinati  sila  og  ubang  kasinatian  nga  makatabang sa pagpauswag  sa ilang  naandang  igtutudlo sa kabataan.

Gipasabot ni Gonzalvo nga ang EQUIP-CEBU usa ka programa ubos sa edukasyon nga gipunting sa RAFI alang  sa pagpalambo sa kalidad sa edukasyon pinaagi sa  kabataan.

Samtang  ang mga programa ubos sa leadership  training  dako kaayo  og  ikatabang  sa  mga  bata  nga  gitudloan  sa  mga nakatambong  niini.  (BANAT NEWS)