CEBU, Philippines - Gikiha sa mga residente sa barangay Kalunasan ang mga opisyal sa ilang barangay human mipasar og resolution nga nag-endorso sa Monares and Sons Realty and Development Inc, nga hatagan og permiso sa Cebu City Hall.
Ang mga kihante nagkanayon nga sila si barangay kapitan Nunilon Monares Jr., mga konsehal Carlitos Ceniza, Marvin Leyson, Ledesma Tamayo, Nestor Gabunada ug Sangguniang Kabataan chairperson Agnes Marie Monares pulos nakalapas sa balaod.
Matud nila nga niadtong Agosto 3, 2011, ang mga respondenti milig-on sa usa ka resolusyon nga nag-endorso ngadto sa Cebu City Zoning and Planning Board pinaagi sa Office of the Cebu City Planning and Development Coordinator, sa aplikasyon.
Kini may labot sa preliminary approval alang sa locational clearance and site development sa Monares and Sons Realty and Development Inc. sa buksan niini nga Villa Monares Housing Subdivision Project. Ang Housing Subdivision Project nahimutang sa Upper Kalunasan, sa dakbayan sa Sugbo.
Ang mga kihante mao sila si Reil Tanudtanud, Jefferson Lapori, Christopher Timplado, Valentin Roca ug James Roca.
Matud nila nga si Monares mao ang tag-iya sa Monares and Sons Realty Development Inc. Ang kaso nga gisang-at mao ang gross misconduct, conduct unbecoming violation of RA 6713 and RA 3019 Sec. 3(a) and (e) or anti-graft and corrupt practices act.
Ang Banat News igo lang nakahinabi kang barangay administrator Policarpio Bolante Jr. kinsa miingon nga wala didto ang kapitan sa iyang buhatan. (BANAT NEWS)