CEBU, Philippines - Usa ka polis ang naangol human madasmagi sa patrol jeep nga padung untang benditahan sa chaplain sa kapolisan diha sa atubangang bahin sa Barili Police Station sa miaging adlaw.
Ang naangol mao si SPO1 Esteliore Cutas Cañete nga sakop sa kapolisan sa lungsod sa Barili. Ang nakadasmag kaniya mao si PO2 Dan Villardar nga sakop sab sa Barili Police Station. Base sa pasiunang imbestigasyon sa kapolisan sa Barili nasuta nga padulong nga iabante ni PO2 Villardar ang patrol jeep aron mabenditahan kini uban sa usa ka Toyota Innova patrolcar ni Rev. Father Arnulfo Castillo.
Matud pang PO2 Jorgie Dumagos dihang nahinabi sa Banat News pagpaandar pa lang ni Villardar sa patrol jeep kalit kini miabante kay napaak ang kambyada niini ug nadumbolan si SPO1 Cañete nga nagbarog sa atubangan sa maong sakyanan.
Ang walang tiil ni Cañete giingong nabali hinungdan sa pagkalandig niini sa tambalanan sa Cebu City. (BANAT NEWS)