CEBU, Philippines - Usa ka libreng legal consultation ang ipahigayon sa Department of Justice (DOJ) atol sa usa ka outreach program pahinungod sa ika-116 ka tuig nga kasumaran sa maong buhatan dinhi sa lalawigan sa Sugbo.
Ang DOJ magsaulog niini karong Septiyembre 16 sa tibuok nasud, sumala ni Jayson Morata, tigpamaba sa maong buhatan.
Mitug-an si Morata sa Banat News kagahapon adto sa lungsod sa Alegria himuon ang outreach program sa Septiyembre 27-28 ning tuiga.
Atol sa outreach program dunay libreng legal consultations, paghatag og NBI clearances, moanha usab ang Bureau of Immigration (BI); Philhealth, ug Social Security System (SSS).
Matud pa ni Morata nga ang maong mga ahensya sa kagamhanan maoy moatiman sa mga molupyo sa tanang lungsod sa habagatan sa maong mga adlaw.
Ang tagsa-tagsa ka ahensya moalagad sa katawhan nga gikan sa mga lungsod sa Moalboal, Badian, Santander, Boljoon, Dumanjug, Alcoy ug tanang lungsod sa habagatan. (BANAT NEWS)