CCTV cam gipanaod na sa Naga

CEBU, Philippines - Gianam-anam  pagtaod  ang  mga Close Circuit Television (CCTV) cam sa nagkadaiyang  lugar sa dakbayan sa Naga

Gawas sa CCTV may  mga  devices  usab  nga  itaud sa daplin  sa kasapaan  alang  sa pag-monitor  sa  baha, gilawmon sa tubig sa sapa, ug gidaghanon sa uwan.

Si June Mendoza, chief executive officer sa Quantum Prosys & Solutions Intl, Inc. mibutyag nga Pond Tilt Zoom (PTZ) cameras ang ilang gipanaud   nga  bisan  unsa  kalayo  sa object  kon butang, klaro  gihapon  kaayo sa maong  camera. Midugang  si Mendoza  nga  bisan ngitngit  ang  palibot, mura lang  og  adlaw    ang  kahayag  sa   retrato niini.

Ang  maong mga camera  gikan  sa US ug  ubos  sa   US standard  ang  kalidad  niini.

Sa pagkakaron  unang gipanaoran  og CCTV  ang barangay Poblacion tungod kay mao kini sentro sa siyudad   nga  daghan og tawo.

Matud ni Mendoza  nga nagbutang sila og 80 feet industrial type repeater site  sa bukirang bahin sa Naga.

Gawas niini aduna usab unya’y ibutang nga command center  sa Enan Chiong Activity Center (ECAC) nga nahimutang sa likod sa city hall sa siyudad.

Gipasabot ni Mendoza nga sa maong mga devices mahibaw-an ang gidaghanon sa tubig ug asa paingon ang tubig.

Ang early warning device mosirbato  kung dunay uwan ilabi na kun mokusog kini  aron makabantay ang mga tawo  sa palibot.

Ang siyudad migahin og P19 milyones alang sa mga devices nga gipanaud.

Ang Quantum padayon pa sa ilang pagpahigayon og testing sa  mga devices  nga  ilang  gipanaod  aron masuta  nga  wala  kini  suliran.

Dugang ni Mendoza nga sila ang mobansay sa mga personnel sa siyudad nga idestinong mo -operate sa maong mga kahimanan. (BANAT NEWS)