Hepe sa X-ray project sa BOC bag-o na
CEBU, Philippines - Bag-o na karon ang hepe sa X-Ray inspection project sa Bureau of Customs sa Port of Cebu.
Ang paghulip sa karaang pangulo sa maong buhatan gibase sa memorandum nga giluwatan ni Customs Commissioner Ruffy Biazon.
Ang maong kamanduan ni Biazon nga gipatuman kagahapon nagtudlo kang Lt. Pedro Irenio Guttierez nga mao nay molingkod isip hepe sa XIP Bureau of Customs Cebu office.
Si Guttierez maoy mihulip ni Ronald Dadole ang hepe sa maong buhatan sulod na sa pipila ka tuig.
Samtang si Joel Gilbert Reyes gitudlo usab nga assistant ni Guttierez hulip ni Jaron Baragona. Samtang si Benjamen Cajuson maoy gitudlo nga facility supervisor isip hulip usab ni Jun Nagac. Sila si Dadole, Baragona ug Nagac magpabilin pa hinuon sa XIP Cebu apan gikatahong wala una hatagi og assignment.
Nasayran nga nakontrobersiya ang maong buhatan human ang pagkalambigit sa pipila ka mga kawani sa XIP Cebu sa rice smuggling nga gi-consign sa Mobilla sa Mactan Export Processing Zone. (BANAT NEWS)
- Latest
